Foreldrasamvinna

Umgengnissamningur og samkomulag um foreldrasamvinnu

Sátt og fyrirsjáanleiki í foreldrasamvinnunni eru til þess fallin að skapa bestu mögulegu skilyrði fyrir ykkur og börnin ykkar.

Ef parsambandi ykkar lýkur, þurfið þið að ná samkomulagi um ýmsa þætti í tengslum við börnin ykkar. Hvar eiga börnin að búa? Förum við áfram sameiginlega með forsjá barnanna? Hvaða tilhögun á að vera á dvöl barnanna hjá hvoru foreldri um sig? Á annað foreldrið að greiða hinu meðlag?

Þrátt fyrir að parsambandi ykkar sé lokið og þið búið ekki lengur saman þá eruð þið bæði áfram fjölskylda barnanna út lífið. Fyrir marga reynist samvinnan um börnin erfið og upp koma deilur. Það er þungbært fyrir börnin, þegar það fólk sem þeim þykir allra vænst um, á í deilum. Jákvæð foreldrasamvinna hefur jákvæð áhrif á líðan og stöðu ykkar sjálfra en ekki síst á stöðu og líðan barnanna ykkar og þar með tækifæri þeirra til að aðlagast breyttum aðstæðum og alast upp við bestu mögulegu skilyrði. Samkomulag um foreldrasamvinnu er mikilvægt verkfæri til að ná því markmiði.

Eftirfarandi eru dæmi um þætti sem gagnlegt getur verið að sé samkomulag um í foreldrasamvinnu:

• Fyrirkomulag reglulegrar umgengni
• Hvernig fer barnið á milli heimila ?
• Hvað hefur barn með sér á milli heimila ?
• Umgengni í leyfum og yfir hátíðar
• Fyrirkomulag samskipta til að tryggja flæði nauðsynlegra upplýsinga
• Hverju ætla foreldrar að standa sameiginlega að í tengslum við barnið ?
• Foreldraviðtöl
• Ákvarðanir um tómstundir

Allir foreldrar vilja skapa börnum sínum bestu möguleg skilyrði. Í því samhengi er vert að íhuga eftirfarandi með tilliti til stöðu og líðan barnanna ykkar við samvistarslit ykkar foreldranna:

• Hvernig metur þú líðan barnsins ykkar í dag ?
• Hvað gerir þú til að hjálpa því til að takast á við núverandi stöðu ?
• Hvað gætir þú gert betur eða öðruvísi ?
• Blandast barnið þitt einhvern tíma í deilur hinna fullorðnu eða önnur fullorðinsmál ?
• Hver hjálpar barninu ykkar með erfiðar upplifanir, eins og sorg og óöryggi, í tengslum við samvistarslit foreldranna ?
• Hvernig getur þú skapað aðstæður sem auðvelda barninu ykkar að ræða við þig eða ykkur um tilfinningar sínar ?
• Hvaða minningar verða erfiðustu minningar barnsins ykkar af samvistarslitunum eða deilum ykkar ?
• Hvaða mynd mun barnið eiga af því hvernig þið tókust á við það sem ykkur greindi á um ?
• Hver eru sameiginleg markmið ykkar með tilliti til velferðar barnsins ykkar ?
• Hvernig getið þið í sameiningu, stuðlað að því að grundvallarþörfum barnsins ykkar eins og góð umönnun, jákvæð tengsl, stöðugleiki, öryggi og ró verði uppfylltar ?
• Hvað vonist þið til að barnið ykkar, þegar það er orðið fullorðið og lítur til baka á samvistarslitin, segi um ykkur sem foreldra ?